كلوب انواع موالات ايله آراسته كتاب مشكين نقاب لرين كتوروب مضمون شريفنده مقدما سر حدده اولان امرا و حكام و سائر عساكر اسلامك مال رعيت و تجارك اسباب تجارت لرينه تطاول و تجاوز لرى اولمغله عرض و ناموس سلطنت تحمل ايلميوب مقدما دست تصرف مزده اولان مملكتمزك كير و تصرفنه دقت اولنوب قبضهء تسخيره كتورلمشدر ديو بومضمون مكنون ايله نقض عهد بو طرفه اسناد اولنمش و پادشاهان سلف زمان لرنده اولان بعض مواد سبب نقض عهد اولديغنه اشارت بيورلمش علم شريف ثريا منزلت لرينه ضوء نهار كبى ظاهر و باهر دركه مقدما طرفيندن وارد اولان نامه لرك هر برنده نقض عهدى مشتمل اولان معانى و مقدمات كرات ايله تفصيل و عيان اولنمغله كلام صواب انجام جانبيندن تسلسله مؤدى اولديغندن امور صلح و صلاح تمشيت بولمغه نيتلرى اولمغله بو دفعه اول احوال اختصار اولنمق اختيار اولنمشدر نامهء نامى لرنده بوند نصكره احوال مصالحه مراد اليسه مضى ما مضى سلاطين ماضيه زمان لرنده اولديغى اوزره مبانى صلح و صلاح مشيد و مراسم موالات و مصافات مؤيد اولسون ديو بيورلمش مشاراليه ايلچيلرى فخر المعتمدين محمد آغاى روملو زيد قدره ايله مشاوره اولنوب كير و مكتوب مخالصت نشان تحرير اولنمشدر . علم شريف آفتاب اضائت لرينه خفى و ناپيدا دكلدر كه بوندن اقدم عليين آشيان مرحوم و مغفور له سلطان مراد خان عليه الرحمة والغفران زمان شريف لرنده فتح و تسخيرى ميسر اولان ممالك و قلاع دست تصرف پادشاهى ده اولمق اوزره امور صلح و صلاح قبول و و عهود و ايمان ايله ارسال اولنان مكتوب مختوم لرى اوزره‌كار مصالحه انعقاد بولمق ايدى عساكر نصرت اعلام انكروس طرفنده واقع اعداء لئام خذلهم اللّه الى يوم القيام و حلب و بغداد و شام طرف لرنده اولان جلالى بدنام ايله مقاومته قيام اوزره ايكن بر و طرف ده اولان ممالك محروسه‌مز خالى و اول فرصت غنيمت عدا - و لنمغه حركت اولنمغين على الغفلة ولايت لرى مزه استيلا اولندوغى علم شريف لرينه ظاهر در بو ممالك ده خصوصا خزاين پادشاهى يه متعلق‌يات و يراق و اموال حالا بالكليه يدلرنده ايكن مضى ما مضى فحواسنى امضايه طرف پادشاهيدن اصلا چهرهء رضا اولمدوغى ذوى العقول دن اولنلره ابين و ارباب عقل ورشاده مبرهن در . بو قدر ممالك